Skólinn

Frístundastarf

Frístundaheimilið Laugarsel er fyrir börn í 1.- 2. bekk og safnfrístundin Dalheimar er fyrir börn í 3.- 4. bekk í Laugarnesskóla og Langholtsskóla. 

Stjórnendur

Skólastjóri er Björn Gunnlaugsson

Aðstoðarskólastjóri og deildarstjóri í 1. og 2. bekk er María Guðmundsdóttir

Deildarstjóri stoðþjónustu er Erla Baldvinsdóttir 

Deildarstjóri 3.-6. bekk er Sesselja Ósk Vignisdóttir

• Meira um Laugarnesskóla

Skólareglur

Í Laugarnesskóla er lögð áhersla á samvinnu allra sem þar starfa við að byggja upp jákvæðan starfsanda og leysa ágreining friðsamlega, af umburðarlyndi og virðingu við alla. Undanfarin ár hefur verið innleitt heildstætt agakerfi PBS, sem miðar að því að allir starfsmenn skólans komi að mótun og viðhaldi æskilegri hegðun í skólanum. Til þess að svo megi verða er mikilvægt að hver og einn virði náunga sinn sem sjálfan sig og trufli ekki aðra við vinnu sína.

Grunnskóli er vinnustaður nemenda og þeirra annað heimili. Allir nemendur grunnskóla eiga rétt á kennslu við sitt hæfi í hvetjandi námsumhverfi í viðeigandi húsnæði sem tekur mið af þörfum þeirra og almennri vellíðan. Allir nemendur eiga rétt á að fá að stunda nám við skólann í friði og öryggi. Allir nemendur eiga rétt á að koma skoðunum sínum á framfæri.   

Nemendur bera ábyrgð á framkomu sinni og samskiptum með hliðsjón af aldri og þroska. Nemendum ber að hlíta fyrirmælum kennara og starfsfólks skólans í öllu því sem skólann varðar, fara eftir skólareglum og fylgja almennum umgengnisreglum í samskiptum við starfsfólk og skólasystkin. 

• Við hrósum fyrir það sem vel er gert og hjálpumst að við að laga það sem miður fer.
• Við komum fram við aðra eins og við viljum láta koma fram við okkur. 

Góð umgengni innandyra 

Nemendum ber að ganga vel um húsnæði og skólalóð, virða þær reglur sem settar eru og fara að fyrirmælum starfsfólks. Nemendum og starfsfólki ber að sýna prúðmannlega framkomu og bera virðingu fyrir öllu umhverfi sínu 

• Við heilsum og kveðjum á hæverskan hátt og sýnum hvert öðru virðingu í orðum og gerðum. 
• Við göngum ávallt hægra megin í stigum og á göngum. 
• Við göngum hljóðlega um skólahúsnæðið. 
• Við gætum þess að það ríki vinnufriður á sameiginlegum vinnusvæðum. 
• Við bíðum í röð þangað til kemur að okkur. 
• Við hengjum yfirhafnir á snaga og röðum skóm snyrtilega. 

Góð hegðun í matsalnum 

• Við göngum í röð frá skólastofu í matsal. 
• Við bíðum í röð eftir því að komi að okkur. 
• Við sitjum prúð á meðan við mötumst. 
• Við höfum hljótt meðan borðað er. 
• Við göngum snyrtilega frá þegar við erum búin að borða og förum aftur í stofuna eða í frímínútur. 

Góð hegðun utandyra 

Samskipti nemenda í útivist skulu einkennast af félagsanda, tillitssemi og virðingu fyrir umhverfi, skólafélögum og starfsfólki. 

• Við tökum tillit til annarra í frímínútum. 
• Við göngum vel um trjágróður og leiktæki. 
• Við virðum rétt annarra til að fá að vera í friði. 
• Við komum inn strax og skólabjallan hringir. 
• Við köstum einungis snjó á afmörkuðu leiksvæði. 
• Við látum hjól, hlaupahjól eða línuskauta vera í frímínútum.
• Ef við verðum vör við að einhverjir eru að brjóta skólareglur snúum við okkur til starfsmanna.  

Nemendur eiga að vera á skólalóð í frímínútum og halda sig á fyrirfram ákveðnum svæðum. Boltavöllum er úthlutað eftir ákveðnu kerfi og ber nemendum að virða rétt annarra til notkunar þeirra. Hætta skal leikjum þegar skólabjalla hringir og fara inn. Nemendum ber að fara í útivist í frímínútum. Ef nemandi þarf að vera inni af einhverjum orsökum geta foreldrar óskað þess og þurfa að senda skriflega beiðni um slíkt til umsjónarkennara. 

Góð hegðun í ferðum á vegum skólans

Skólareglur Laugarnesskóla gilda i öllum ferðum. Nemendur eru fulltrúar skólans í þeim ferðalögum sem farin eru á vegum hans. Þeim ber að hlíta sömu reglum á ferðalögum sem og í skólanum. Komist nemandi af einhverri ástæðu ekki með í skipulagðar vettvangs- eða nemendaferðir er honum ætlað að mæta í skólann til       annars skólastarfs. Nemendur og foreldrar/forráðamenn fá upplýsingar um fyrirhuguð ferðalög/vettvangsferðir tímanlega. Ef ferðalag á vegum skólans stendur yfir nótt þarf skriflegt leyfi foreldra/forráðamanna. Hafi málum nemanda verið vísað til skólastjórnenda vegna brota á skólareglum er  það ákvörðun skólastjórnar í samráði við umsjónarkennara hvort viðkomandi nemandi fær heimild til þátttöku í ferð á vegum skólans. Ávallt skal gera ráðstafanir til þess að nemandinn fái umönnun eða kennslu á meðan á ferðinni stendur og tilkynna foreldrum/forráðamönnum ástæður og tilhögun. Gerist nemandi sekur um brot á skólareglum eða landslögum þar sem hann er á vegum skólans verður hann sendur heim á kostnað foreldra/forráðamanna sinna.